بادلوں سے برسا پانی بپھرا تو سیلاب بن کر ہر شے کو روندتا ہوا سمندر کی طرف بڑھتا رہا ۔ سیلاب کے باعث مزید چوبیس افراد لقمہ اجل بن گئے ۔۔ اموات کی مجموعی تعداد تیرہ سو چودہ تک جا پہنچی ۔
بارشوں اور سیلاب سے مزید چوبیس لوگ زندگی کی بازی ہار چکے ۔ چوبیس گھنٹوں میں سب سے زیادہ سندھ میں انیس اموات رپورٹ ہوئیں ۔ نیشنل فلڈ رسپانس کوآرڈی نیشن سنٹر نے سیلاب کی تباہ کاریوں کے تازہ اعداد و شمار جاری کر دیئے ۔
بارشوں اور سیلاب کے باعث مختلف حادثات میں مزید ایک سو پندرہ افراد زخمی ہوئے ۔ چودہ جون سے اب تک بارہ ہزار سات سو تین افراد کو چوٹیں آئیں ۔ جنہیں علاج معالجے کی سہولیات فراہم کی گئیں ۔
این ایف آر سی سی کے مطابق سندھ، بلوچستان اور خیبرپختونخوا میں سب سے زیادہ تباہی ہوئی ۔ سیلاب سے تین مزید پلوں کو نقصان پہنچا ۔۔ جس کے بعد مجموعی طور پر دو سو چھیالیس پل سیلابی ریلوں سے متاثر ہو چکے ہیں ۔
