مہنگائی کے مارے عوام پر بجلی گرانے کے بعد حکومت نے پٹرول بھی چھڑک دیا، پٹرول اور ڈیزل کی قیمتوں میں اضافہ کر دیا گیا.
ایک ہی دن میں حکومت نے عوام کو دو بڑے جھٹکے دے ڈالے،، نیپرا نے صبح بجلی کی قیمت میں 4 روپے 34 پیسے یونٹ مہنگی کی تو رات گئے پٹرولیم مصنوعات کی قیمتوں میں پھراضافہ کر دیاگیا.
وزارت خزانہ نے پیٹرولیم مصنوعات کی نئی قیمتوں کا نوٹیفکیشن جاری کر دیا پیٹرول کی قیمت 2 روپے 7 پیسے فی لیٹر بڑھ گئی جس کے بعد پیٹرول کی نئی قیمت 235 روپے 98 پیسے ہوگئی ہے جس پر عوام نے شدید رد عمل کا اظہار کیا ہے.
ہائی اسپیڈ ڈیزل کی قیمت میں 2 روپے 99 پیسے اضافہ کیا گیا ہے جس کے بعد نئی قیمت 247 روپے 43 پیسے ہوگئی جبکہ لائٹ ڈیزل 9 روپے 79 پیسے مہنگا ہونے کے بعد فی لٹر 201 روپے 54 پیسے ہو گیا.
حکومت نے مٹی کے تیل کی قیمت میں بھی 10 روپے 92 پیسے اضافہ کردیا جس کے بعد مٹی کے تیل کی نئی قیمت 210 روپے 32 پیسے فی لیٹر مقرر کردی گئی، نئی قیمتوں کا اطلاق یکم ستمبر سےہوگیا.
